សម្ដេចតេជោ ស្នើឱ្យអាជ្ញាធរត្រូវកំណត់តំបន់ ដែលមានការឆ្លងរាលដាលធ្ងន់ធ្ងរនៃជំងឺកូវីដ-១៩ ជា «តំបន់ក្រហម» ហើយត្រូវរឹតបន្តឹងវិធានការលម្អិត
ប្រមុខរាជរដ្ឋាភិបាលកម្ពុជា សម្ដេចអគ្គមហាសេនាបតីតេជោ ហ៊ុន សែន បានស្នើឱ្យអាជ្ញាធរអនុវត្តវិធានការបិទខ្ទប់ (គ.ប.ខ) ត្រូវកំណត់តំបន់ដែល មានការឆ្លងរាលដាលធ្ងន់ធ្ងរនៃជំងឺកូវីដ-១៩ នៅក្នុងទីតាំងភូមិសាស្ត្រដែលត្រូវបានបិទខ្ទប់ជា «តំបន់ក្រហម» ហើយត្រូវរឹតបន្តឹងការអនុវត្តវិធានការលម្អិត ឱ្យបានម៉ឺងម៉ាត់នៅក្នុងតំបន់ក្រហមនេះ។
នៅក្នុងសេចក្ដីណែនាំ ស្ដីពីវិធានការលម្អិតដើម្បីរឹតបន្តឹងការអនុវត្តសេចក្ដីសម្រេចស្ដីពី ការបិទខ្ទប់ភូមិសាស្ត្ររាជធានីភ្នំពេញ និងក្រុងតាខ្មៅ នៃខេត្តកណ្ដាល ដើម្បីទប់ស្កាត់ការឆ្លងរាលដាលនៃជំងឺកូវីដ-១៩ ចុះថ្ងៃទី១៩ ខែមេសា ឆ្នាំ២០២១ សម្ដេចតេជោ ហ៊ុន សែន បានគូសបញ្ជាក់ថា បុគ្គលគ្រប់រូបត្រូវបានហាមឃាត់មិនឱ្យធ្វើដំណើរចេញពីលំនៅឋាន ឬទីសំណាក់បច្ចុប្បន្នរបស់ខ្លួន ដោយរួមទាំងការមិនអនុញ្ញាតឱ្យធ្វើសកម្មភាពកីឡានៅខាងក្រៅលំនៅឋាន ឬទីសំណាក់របស់ខ្លួន លើកលែងតែការធ្វើដំណើរក្នុងមូលហេតុសុខភាពបន្ទាន់ និងការធ្វើដំណើរទៅជួបមន្ត្រី សុខាភិបាលដើម្បីយកសំណាកទៅវិភាគរកមេរោគកូវីដ-១៩ ឬចាក់វ៉ាក់សាំងការពារជំងឺកូវីដ ដួសទី២ នៅទីតាំងជិតបំផុតក្នុងតំបន់ក្រហមតាមការកំណត់ និងដោយមានការអនុញ្ញាតពីអាជ្ញាធរមានសមត្ថកិច្ច។
សម្ដេចតេជោបន្តថា ចំពោះផ្សារ និងទីកន្លែងលក់ម្ហូបអាហារ និងគ្រឿងឧបភោគបរិភោគ ព្រមទាំងសកម្មភាពការងារ មុខរបរ និងអាជីវកម្មទាំងអស់នៅក្នុងតំបន់ក្រហម ត្រូវផ្អាកជាបណ្ដោះអាសន្ន លើកលែងតែសកម្មភាពការងារ ដែលត្រូវបានអនុញ្ញាតឱ្យដំណើរការជាធម្មតា មានដូចជា (១)-សេវាពន្លត់អគ្គិភ័យ (២)-សេវាផ្គត់ផ្គង់អគ្គិសនី (៣)-សេវាផ្គត់ផ្គង់ទឹកស្អាត (៤)-សេវាសង្គ្រោះបន្ទាន់ និងសេវា សុខាភិបាលទាំងរដ្ឋ និងឯកជន ដោយរួមទាំងឱសថស្ថានផង (៥)-ទីតាំងផលិត និងផ្គត់ផ្គង់ អាល់កុល និងអុកស៊ីហ្សែន (៦)-ទីតាំងផលិត និងផ្គត់ផ្គង់មី (៧)-ទីតាំងលក់ហ្គាសសម្រាប់ចម្អិនអាហារ (៨)-សេវាផ្គត់ផ្គង់ស្បៀងរបស់រដ្ឋ និងជំនួយសង្គ្រោះបន្ទាន់ (៩)-សេវាផ្គត់ផ្គង់ឱសថ និងសម្ភារបរិក្ខាពេទ្យ និង (១០)-សេវាប្រមូល និងដឹកជញ្ជូនសំរាម-សំណល់រឹង។
នៅក្នុងសេចក្ដីណែនាំសម្ដេចតេជោបានសង្កត់ធ្ងន់ថា ហាមឃាត់ដាច់ខាតរាល់ការធ្វើដំណើរចេញ-ចូល ឆ្លងកាត់តំបន់ក្រហមនេះទាំងអស់ លើកលែងតែ (១)-ការធ្វើដំណើររបស់មន្ត្រីរាជការ និងកងកម្លាំងប្រដាប់អាវុធគ្រប់ប្រភេទដែលមានសមត្ថកិច្ច អនុវត្តវិធានការនានាក្នុងអំឡុងពេលបិទខ្ទប់ ដោយត្រូវភ្ជាប់ជាមួយនូវលិខិតបញ្ជាបេសកកម្ម (២)-ការធ្វើដំណើរដែលទាក់ទងនឹងសកម្មភាពចុះចែកជំនួយសង្គ្រោះបន្ទាន់ដែលរៀបចំដោយ គ.ប.ខ ដោយភ្ជាប់ជាមួយនូវអត្តសញ្ញាណប័ណ្ណ និងលិខិតបញ្ជាបេសកកម្មដែលចេញដោយ គណៈកម្មការប្រតិបត្តិនៃ គ.ប.ខ (៣)-ការធ្វើដំណើររបស់មន្ត្រី និងបុគ្គលិកផ្នែកសុខាភិបាល ទាំងរដ្ឋ និងឯកជនដោយរួមទាំងផ្នែកឱសថស្ថាន ដោយមានលិខិតអនុញ្ញាតចេញដោយក្រសួងសុខាភិបាល (៤)-ការធ្វើដំណើររបស់មន្ត្រី និងបុគ្គលិកនៃសេវាពន្លត់អគ្គីភ័យ (៥)-ការធ្វើដំណើរ របស់មន្ត្រី និងបុគ្គលិកនៃសេវាផ្គត់ផ្គង់អគ្គិសនី និងទឹកស្អាត និងសេវាផ្គត់ផ្គង់ស្បៀងរបស់រដ្ឋដោយត្រូវភ្ជាប់ជាមួយនូវលិខិតបញ្ជាបេសកកម្ម (៦)-ការធ្វើដំណើររបស់មន្ត្រី និងបុគ្គលិកដើម្បីចេញ-ចូលទីតាំងឃ្លាំងស្តុកទំនិញយុទ្ធសាស្ត្ររបស់រដ្ឋ ដោយត្រូវភ្ជាប់ជាមួយនូវលិខិតបញ្ជបេសកកម្ម (៧)-ការធ្វើដំណើររបស់មន្ត្រី និងបុគ្គលិកនៃសេវាសង្គ្រោះបន្ទាន់ទាំងរដ្ឋ និងឯកជនដោយមានលិខិតអនុញ្ញាតចេញដោយក្រសួងសុខាភិបាល (៨)-ការធ្វើដំណើររបស់បុគ្គលិក ទីតាំងផលិត និងផ្គត់ផ្គង់ ដោយមានលិខិតអនុញ្ញាតធ្វើដំណើររបស់គណៈកម្មការប្រតិបត្តិ គ.ប.ខ (៩) ការធ្វើដំណើររបស់បុគ្គលិកនៃទីតាំងផលិត និងផ្គត់ផ្គង់អាល់កុល និងអុកស៊ីហ្សែន ដោយមានលិខិតអនុញ្ញតធ្វើដំណើររបស់គណៈកម្មការប្រតិបត្តិនៃ គ.ប.ខ និង (១០)-ការធ្វើ ដំណើររបស់បុគ្គលិកលក់ និងចែកចាយហ្គាសសម្រាប់ចម្អិនអាហារដោយមានលិខិតអនុញ្ញាតធ្វើ ដំណើររបស់គណៈកម្មការប្រតិបត្តិនៃ គ.ប.ខ.។
សេចក្ដីណែនាំក៏បានបញ្ជាក់ដែរថា ក្នុងករណីមានការបំពានវិធានការហាមឃាត់ការធ្វើដំណើរ និងវិធានការហាមឃាត់សកម្មភាពការងារ មុខរបរ ឬអាជីវកម្មខាងលើនេះ អាជ្ញាធរអនុវត្តវិធានការបិទខ្ទប់ត្រូវអនុវត្តវិធានការច្បាប់ យ៉ាងម៉ឺងម៉ាត់ ដោយរួមទាំងការឃាត់ទុកជាបណ្តោះអាសន្ននូវមធ្យោបាយធ្វើដំណើរ និងទណ្ឌកម្ម រដ្ឋបាលផ្សេងទៀត ដោយអនុលោមតាមបទប្បញ្ញត្តិ និងនីតិវិធីជាធរមាន។ សម្ដេចតេជោនាយករដ្ឋមន្ត្រី ក៏បានស្នើឱ្យក្រសួងពាណិជ្ជកម្ម ត្រូវរៀបចំសម្របសម្រួលជាបន្ទាន់ឱ្យមានការផ្គត់ផ្គង់ ដឹកជញ្ជូន និងចែកចាយស្បៀង រួមមាន អង្ករ មី ត្រីខកំប៉ុង ទឹកត្រី ទឹកស៊ីអ៊ីវ និងទឹកបរិសុទ្ធ ព្រមទាំងគ្រឿងឧបភោគបរិភោគដែល ចាំបាច់ផ្សេងទៀត ដើម្បីលក់ឱ្យប្រជាពលរដ្ឋរស់នៅក្នុងតំបន់ក្រហម ដោយអនុវត្តសេវាលក់តាមប្រព័ន្ធទូរស័ព្ទ ឬអនឡាញ និងការដឹកជញ្ជូនចែកចាយដល់មុខផ្ទះ។ ទន្ទឹមនឹងនេះ ក៏បានស្នើឱ្យអាជ្ញាធរអនុវត្តវិធានការបិទខ្ទប់ ត្រូវចាត់ចែងជាបន្ទាន់ដើម្បីចែកចាយនូវជំនួយសង្គ្រោះបន្ទាន់ រួមមាន អង្ករ មី ត្រីខកំប៉ុង ទឹកត្រី និងទឹកស៊ីអីវ ជូនដល់ប្រជាពលរដ្ឋងាយរងគ្រោះប្រជាពលរដ្ឋក្រីក្រ និងមានការ លំបាកក្នុងជីវភាពនៅក្នុងតំបន់ក្រហមផងដែរ។
គិតត្រឹមយប់ថ្ងៃទី១៩ ខែមេសា ឆ្នាំ២០២១នេះ រដ្ឋបាលរាជធានីភ្នំពេញ បានចេញសេចក្ដីសម្រេចកំណត់តំបន់មួយចំនួននៅភ្នំពេញ ក្នុងនោះមាន សង្កាត់ស្ទឹងមានជ័យទី១ សង្កាត់ស្ទឹងមានជ័យទី២ និងសង្កាត់ស្ទឹងមានជ័យទី៣ ខណ្ឌមានជ័យ សង្កាត់ចោមចៅទី១ ខណ្ឌពោធិ៍សែនជ័យ និងភូមិ៤ ភូមិ១៦ និងភូមិ១៧ នៃសង្កាត់បឹងសាឡាង ខណ្ឌទួលគោក ដែលមានការឆ្លងរាលដាលធ្ងន់ធ្ងរ នៃជំងឺកូវីដ១៩ ជា «តំបន់ក្រហម»៕ ដោយ ជឹម ណារី សម្រួលផ្សាយដោយ៖ ធូ កុសល
No comments: