សម្តេចអគ្គមហាពញាចក្រី​ ហេង សំរិន ប្រកាសបរិច្ចាគប្រាក់បៀវត្សរ៍ ៨លានរៀលក្នុង១ខែ រយៈពេល៦ខែ សម្រាប់ចូលរួមទិញវ៉ាក់សាំងចាក់ជូនប្រជាពលរដ្ឋ

 (ភ្នំពេញ)៖ យោងតាមបណ្តាញទំនាក់ទំនងសង្គម រដ្ឋសភាជាតិនៃព្រះរាជាណាចក្រកម្ពុជា បានឲ្យដឹងថា សម្តេចអគ្គមហាពញាចក្រី ហេង សំរិន ប្រធានរដ្ឋសភា នៅព្រឹកថ្ងៃទី៨ ខែធ្នូ ឆ្នាំ២០២០នេះ បានប្រកាសបរិច្ចាគប្រាក់បៀវត្សរ៍ ក្នុងមួយខែ ៨លានរៀល រយៈពេល ៦ខែ ចាប់ពីខែធ្នូ ឆ្នាំ២០២០ តទៅ សម្រាប់ចូលរួមទិញវ៉ាក់សាំងការពារជំងឺកូវីដ១៩។

គួរបញ្ជាក់ផងដែរថា ការប្រកាសរបស់ សម្តេច ហេង សំរិន បានធ្វើឡើងបន្ទាប់ពី សម្តេចអគ្គមហាសេនាបតីតេជោ ហ៊ុន សែន ប្រមុខរាជរដ្ឋាភិបាលកម្ពុជា បានប្រកាសកាលពីថ្ងៃទី៧ ខែធ្នូ ឆ្នាំ២០២០ថា កម្ពុជាកំពុងត្រៀមថវិកាទិញវ៉ាក់សាំងកូវីដ១៩ មកចាក់ជូនប្រជាពលរដ្ឋដោយឥតគិតថ្លៃ។

សម្តេចបានបញ្ជាក់ថា ការទិញជាជំហានដំបូង នឹងមានចំនួន ១លានដូស ដើម្បីចាក់ប្រជាពលរដ្ឋប្រមាណ ៥០ម៉ឺននាក់៕

ដោយ៖ កន ចំណាន